موبایل نامینتە دناڤ دەستێن مرۆڤان دا، دێ لجهەکی دناڤ لەشێ وی دا ئێتە چاندن، ل کیڤە؟

مارتن کوبر ئەوێ داهێنانا موبایلێ (تێلەفونا دەستی) بو وی ڤەدگەڕیت، د چاڤپێکەفتنەکێ دا بو کەناڵێ CNBC یێ ئەمریکی پێشبینی دکەت موبایل نامینتە دناڤ دەستێن مرۆڤان دا، چونکە هەر جارەکا مرۆڤ پەیوەندیێ دکەت یان بەرسڤا کەسەکی د دەت پێدڤی دبیت دەستێ خۆ بلند بکەت تا بگەهینتە بەرگوهێ خۆ، دبێژیت ئەز پێشبینی دکەم د داهاتیەکێ نێزیک دا موبایل وەک چیپەکی د ناڤ چەرمێ گوهی دا بێتە چاندن.

مارتن ئەوێ ئەڤ سالە د کونفرانسێ بەرشەلوند یێ موبایلێ دا پشکداربوی دبێژیت ئەڤ جورێ ئامیرا پێدڤی ب بارکرنێ (شەحنێ) نابیت، چونکە مرۆڤ خارنێ دخۆن و وێ خارنێ دکەنە هێز، و ئەڤ ئامیرە ژی پێدڤی بگەلەک بارکرنێ نابیت.

مارتن کوبر (یێ ٩٥ سالی) دبێژیت نوکە بکارئینانا موبایل گەلەک ب زەحمەت کەفتی یە، ئەگەر من ڤیا پەیوەندیێ بکەم و من هێدفون نەبیت پێدڤیە ئەز ڤێ شاشا مەزن بدانمە بەر گوهێ خۆ، دەستێمن پێڤە بیت بشێوەکێ نەگونجایی.

و لدویف بوچونێن ناڤبری هێشتا سەردەمێ زێڕین یێ تەکنولوجیایێ یێ بڕێڤەیە تایبەت د بیاڤێ فێرکرنێ و ساخلەمیێ دا، و دیاردکەت لدەمکێ نێزیک دێ چیپێن زۆر بچویک ئامیرێن هەستپێکرنێ د لەشێن مرۆڤان دا هێنە چاندن.